नेपालको निर्वाचन सफलतापूर्वक सम्पन्न भएकोमा भारतका प्रधानमन्त्री मोदीद्वारा बधाई

नरेन्द्र मोदी ले नेपालमा सम्पन्न निर्वाचन सफल र शान्तिपूर्ण रूपमा सम्पन्न भएकोमा नेपाली जनता र नेपाल सरकारलाई बधाई दिएका छन्।

सामाजिक सञ्जालमार्फत् प्रतिक्रिया दिँदै भारतका प्रधानमन्त्री मोदीले नेपाली दाजुभाइ तथा दिदीबहिनीहरूले लोकतान्त्रिक अधिकार उत्साहपूर्वक प्रयोग गरेको देख्दा आफूलाई खुसी लागेको बताएका छन्।

उनले नेपालको लोकतान्त्रिक यात्रामा यो ऐतिहासिक उपलब्धि गर्वको क्षण भएको पनि उल्लेख गरेका छन्।

मोदीले नेपाल र भारतबीचको घनिष्ठ मित्रता र छिमेकी सम्बन्धलाई उल्लेख गर्दै भविष्यमा पनि भारत नेपालको जनता र नयाँ सरकारसँग मिलेर साझा शान्ति, प्रगति र समृद्धिका लागि सहकार्य गर्न प्रतिबद्ध रहने बताएका छन्।

नेपालमा हालै सम्पन्न निर्वाचनलाई अन्तर्राष्ट्रिय स्तरमा पनि चासोका साथ हेरिएको छ।